Psalms 18

Ya Mukulu wa Bayimbi. Zabbuli ya Dawudi gye yayimbira Mukama bwe yamuwonya abalabe be ne Sawulo.

1Nkwagala Ayi Mukama kubanga ggwe maanyi gange.

2 ^a Mukama lwe lwazi lwange, ky’ekigo kyange ekigumu era ye mununuzi wange,
ye Katonda wange era lwe lwazi lwange mwe neekweka;
ye ngabo yange era ye mulokozi wange ow’amaanyi, era kye kigo kyange ekinywevu.
3 ^bNkoowoola Mukama asaana okutenderezebwa,
era amponya eri abalabe bange.

4 ^cEmiguwa gy’okufa gyanneetooloola;
embuyaga ez’okusaanawo zansaanikira.
5 ^dEbisiba eby’amagombe byanneetooloola;
n’emitego gy’okufa ne ginjolekera.
6 ^eMu nnaku yange nakoowoola Mukama;
ne nkaabirira Katonda wange annyambe.
Yawulira eddoboozi lyange ng’ali mu yeekaalu ye;
omulanga gwange ne gutuuka mu matu ge.

7 ^fEmisingi gy’ensi ne gikankana ne giyuuguuma;
ensozi ne zinyeenyezebwa ne ziseeseetuka,
kubanga yali asunguwadde.
8 ^gOmukka ne gunyooka nga guva mu nnyindo ze.
Omuliro ne guva mu kamwa ke,
ne gukoleeza amanda ne gabuubuuka.
9 ^hYayabuluza eggulu n’akka wansi;
ebire ebikutte nga biri wansi w’ebigere bye.
10 ⁱYeebagala kerubi n’abuuka, ▼

▼Bakerubi batonde ba Katonda era babeera mu kitiibwa kye. Be balabirira Entebe ey’Obwakabaka ey’Obwakatonda.

n’aseeyeeyeza ku biwaawaatiro by’empewo.
11 ^kYafuula ekizikiza ekyamwetooloolanga
okuba enkuufiira ey’ebire ebijjudde amazzi.
12 ^lOkumasamasa okwali mu maaso ge ne kuva mu bire bye,
n’okumyansa kw’eggulu n’omuzira.
13 ^m Mukama yabwatuka ng’asinziira mu ggulu; oyo Ali Waggulu Ennyo yayogera;
mu kamwa ke ne muvaamu omuzira n’okumyansa kw’eggulu.
14 ⁿYalasa obusaale bwe n’asaasaanya abalabe;
n’okumyansa okw’eggulu n’abawangula.
15 ^oEbiwonvu eby’omu nnyanja ne bibikkulwa
n’emisingi gy’ensi ne gyeyerula
olw’okunenya kwo Ayi Mukama
n’olw’okubwatuka kw’omukka ogw’omu nnyindo zo.

16 ^p Mukama yagolola omukono gwe ng’ali waggulu,
n’ankwata n’annyinyulula mu mazzi amangi.
17 ^qYamponya abalabe bange ab’amaanyi,
abankyawa, abo abaali bansinza amaanyi.
18 ^rBannumba nga ndi mu buzibu,
naye Mukama n’annyamba.
19 ^sN’antwala mu kifo ekigazi n’amponya,
kubanga yansanyukira nnyo.
20 ^t Mukama ankoledde ng’obutuukirivu bwange bwe buli,
ansasudde ng’ebikolwa byange ebirungi bwe biri.
21 ^uKubanga ntambulidde mu makubo ga Mukama,
ne sikola kibi eri Katonda wange.
22 ^vDdala ddala amateeka ga Mukama gonna ngagondedde,
era ne siva ku biragiro bye.
23Sisobyanga mu maaso ge
era nneekuuma obutayonoona.
24 ^wNoolwekyo, Mukama ansasudde ng’obutuukirivu bwange bwe buli,
era ng’ebikolwa byange ebirungi bwe biri by’alaba.

25 ^xEri omwesigwa weeraga ng’oli mwesigwa,
n’eri atalina musango weeraga nga tolina musango.
26 ^yEri abalongoofu weeraga ng’oli mulongoofu,
n’eri abakyamu weeraga ng’obasinza amagezi.
27 ^zOwonya abawombeefu,
naye abeegulumiza obakkakkanya.
28 ^aaOkoleezezza ettaala yange;
Ayi Mukama Katonda wange, ekizikiza kyange okimulisizza.
29 ^abBwe mbeera naawe nsobola okulumba abalabe bange;
nga ndi ne Katonda wange nsobola okuwalampa bbugwe.

30 ^acKatonda byonna by’akola bigolokofu;
Mukama ky’asuubiza akituukiriza;
era bwe buddukiro
bw’abo bonna abamwekwekamu.
31 ^adKale, ani Katonda, wabula Mukama?
Era ani Lwazi, wabula Katonda waffe?
32 ^aeOyo ye Katonda ampa amaanyi era aluŋŋamya ekkubo lyange.
33 ^afEbigere byange abinyweza ng’eby’empeewo,
n’ansobozesa okuyimirira ku ntikko z’ensozi.
34 ^agAnjigiriza okulwana entalo,
ne nsobola n’okuleega omutego ogw’obusaale ogw’ekikomo.
35 ^ahOmpadde obulokozi bwo okuba engabo yange;
era ompaniridde n’omukono gwo ogwa ddyo;
weetoowazizza n’ongulumiza.
36Ongaziyirizza ekkubo ebigere byange we biyita,
obukongovvule bwange ne butanuuka.

37 ^aiNagoba abalabe bange embiro,
ne mbakwata ne sidda mabega okutuusa nga mbazikirizza.
38 ^ajNababetenta ne batasobola na kugolokoka,
ne mbalinnyako ebigere byange.
39Ompadde amaanyi ag’okulwana;
abalabe bange ne banvuunamira.
40 ^akOkyusizza abalabe bange ne bankuba amabega ne badduka,
ne ndyoka nsanyaawo abo bonna abankyawa.
41 ^alBaalaajana naye tewaali yabawonya;
ne bakaabirira Mukama, naye n’atabaddamu.
42Ne mbamerengula ng’enfuufu empewo gy’efuumuula;
ne mbasammula eri ng’ebisooto by’omu luguudo.

43 ^amOmponyezza obulumbaganyi bw’abantu;
n’onfuula omufuzi w’amawanga.
Abantu be nnali simanyi ne bafuuka abaweereza bange.
44 ^anOlumpulira ne baŋŋondera,
bannamawanga ne bajugumira mu maaso gange.
45 ^aoBannamawanga baggwaamu omutima
ne bava mu bigo byabwe nga bakankana.
46 ^ap Mukama mulamu! Atenderezebwe, Olwazi lwange;
era agulumizibwe Katonda w’obulokozi bwange.
47 ^aqYe Katonda, asasula ku lwange abankola obubi
era akakkanya amawanga ne ngafuga.
Amponyeza abalabe bange.
48 ^arAyi Mukama, ongulumizizza okusinga abalabe bange,
n’onkuuma abakambwe ne batankwatako.
49 ^asNoolwekyo, Ayi Mukama, nnaakutenderezanga mu mawanga,
era nnaayimbanga nga ntendereza erinnya lyo.
50 ^atAwa kabaka obuwanguzi obw’amaanyi,
amulaga ebyekisa emirembe gyonna oyo gwe yafukako amafuta,
eri Dawudi n’eri ezzadde lye.